Bato dela Rosa, Baste Duterte ‘na-back to you’ sa AI; hinamon ni Claire Castro

Baste Duterte, Sara Duterte at Bato dela Rosa

ISANG “estudyante” ang bumuwelta kina Sen. Bato dela Rosa at Davao City Vice Mayor Sebastian “Baste” Duterte sa isyu ng paggamit ng Artificial Intelligence (AI).

Ito’y matapos ngang mag-viral ang ni-reshare ni Sen. Bato sa social media na isang video kung saan mapapanood din ang naturang estudyante na nagtatanggol kay Vice President Sara Duterte.

Sa ni-repost na video ng kaalyadong senador ng pamilya Duterte na isa palang AI-generated content, sinabi ng estudyante na hindi dapat matuloy ang impeachment laban kay VP Sara.

“Mabuti pa ang mga bata nakakaintindi sa mga pangyayari. Makinig kayo mga yellow at mga komunista!” ang inilagay naman na caption ng senador sa kanyang post.

Kasunod nito, binanatan nga ng mga netizen si Bato dahil sa pagbabahagi ng video na isang AI-generated at sinabing nagpapakalat daw siya ng fake news.

Pero bwelta ng senador, “I don’t care if this post is AI generated or Manobo generated because I am not after the messenger, I am after the message so, please don’t shoot the messenger without reading the message that he delivers.”

Kinampihan naman siya ni VP Sara at nagsabing  wala rin siyang nakikitang masama sa mga nagpapakalat ng AI-generated content na nagpapahayag ng pagsuporta sa mga personalidad.

Pagkatapos nga nito, may netizen na naglabas ng video ng AI student sa ni-repost ni Sen. Bato sa socmed at tila nabaligtad na ang unang pahayag nito.

Sabi niya sa bagong AI-generated video, “Hi guys! Huwag kayong tumulad kay Bato at Baste ah, maging mapanuri at mapagmatyag.”

Komento ng mga nakapanood ng nasabing video, talagang delikado nakakapraning ang pagkalat ngayon ng mga AI-generated content lalo na kung hindi naman talaga totoo ang nakapaloob dito.

Sabi nga ni Palace Press Officer Claire Castro sa pagse-share nina Bato at Baste ng AI video na nagtatanggol kay VP Sara,  “The sharing of things like that, again, disinformation, fake news, should not be done by government officials.

“It creates doubts and further erodes trust when disinformation and fake news come from high-ranking officials themselves.

“So now that they’ve done it and there’s nothing we can do about it, the least they can do is acknowledge that the video they shared is false and not authentic,” aniya pa.