Nawawalang law student natagpuang patay sa Cavite, pamilya humiling ng privacy
Anthony Granada
WALA nang buhay nang matagpuan ang nawawalang 25-anyos na law student mula sa isang kilalang university sa Bonifacio Global City.
Noon pang June 8, 2025 napaulat na missing person si Anthony Granada sa pamamagitan ng Taguig City Police na huling nakitang buhay sa kanyang condominium unit sa Taguig City.
“He was last seen around 6:30 PM at Ridgewood Premier Condominium along C-5 Road Northbound in Taguig City,” ayon sa social media post ng naturang police station.
“Anthony is known to frequent the Taguig area due to his studies,” ang mababasa pa sa naturang post.
Base naman sa Facebook post ng nakatatandang kapatid ni Anthony na si Ricky Granada, kahapon, June 21, natagpuan na raw nila si Anthony ngunit patay na ito.
“We just want to update everyone that my dearest brother Anthony Granada has been found, but unfortunately he is with our Creator now.
“On behalf of my family, I would like to express our sincerest gratitude to each and everyone for all your support and prayers during this difficult time,” ani Ricky.
Walang ibinigay na detalye si Ricky tungkol sa pagkamatay ng kapatid pero humiling ang kanilang pamilya ng privacy sa publiko para makapagluksa sa pagpanaw ng bunsong kapatid.
Your kindness has been a great comfort to our family. As we navigate this period, we kindly ask for your understanding and respect for our family’s need for privacy to grieve in the moment. Thank you very much and God bless us all,” ang pahayag pa ni Ricky.
Samantala, base sa mga ulat, natagpuan ang bangkay ng law student sa isang bakanteng lote sa Naic, Cavite.
Sa nakalap na CCTV footage ng pulisya, makikita na sumakay ang estudyante sa isang na-book niyang kotse mula sa isang ride-hailing service, at bumaba sa Naic Town Plaza.
Noong June 17 naman ay muli siyang nakita sa isa pang CCTV footage na naglalakad mag-isa sa Lopez Jaena Bridge dakong 9:20 ng gabi.
Kasunod nito, may nagbigay naman ng impormasyon sa pulisya na may nakitang bangkay sa isang bakanteng lote sa Barangay Sapa, na nasa “advanced state of decomposition” na.
Nang makita ang naturang bangkay, kinumpirma ng pamilya ni Anthony na siya nga ang nawawalang estudyante.
Bagamat wala raw foul play sa pagkamatay ni Anthony, patuloy na iniimbestigahan ang tunay na dahilan ng kaniyang pagkamatay.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.