Harry Roque nagmatapang pa rin, red notice wa epek: Manigas kayo!
INIHAHANDA na ng Department of Justice (DOJ) ang mga kakailanganing dokumento para ipaaresto sa International Crime Police Organization (Interpol) si dating Presidential spokesperson Harry Roque.
Nasa Netherlands ngayon si Roque at kasalukuyang hinihintay ang magiging resulta ng kanyang asylum application doon.
Ayon sa pahayag ng DOJ, nasa plano nito ang pagpapa-red notice kay Roque sa Interpol sakaling magmatigas ang abogado sa desisyon niyang huwag nang bumalik sa Pilipinas.
“We are still preparing the documents needed for an Interpol request for a red notice,” sabi ni DOJ spokesperson Mico Clavano sa isang panayam.
Aniya pa, “In the end, what we want is to give justice to the victims of the qualified trafficking case. Kasama sa trabaho ng gobyerno ang paghanap sa mga sangkot sa krimen at iharap sa husgado.”
Kamakailan ay naglabas na nga ng warrant of arrest ang Angeles City Regional Trial Court (RTC) Branch 118 laban kay Roque at Cassandra Ong dahil sa kasong human trafficking kaugnay ng umano’y mga operasyon ng isang Philippine Offshore Gaming Operator (POGO) hub sa Pampanga.
Kahapon, sa kanyang Facebook live ay nagmatigas pa rin si Roque na hindi siya pwedeng arestuhin dahil sa kanyang asylum application.
“Kahit ano pang kunin n’yong red notice alert diyan, eh manigas kayo! Hindi n’yo ako makukuha habang nakabinbin itong asylum na ‘to dito sa Netherlands,” pahayag ni Roque.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.