PHOTO: Instagram/@marjbarretto
BUONG loob na ipinagmalaki ni Marjorie Barretto na naging patas ang laban niya sa midterm elections 2025.
Sa isang Instagram post, ibinandera ng batikang aktres ang saloobin sa pagkatalo, habang ipinapakita rin ang ilang moments ng kanyang kampanya.
Matatandaang inanunsyo ng aktres ang kanyang kandidatura bilang konsehal noong October 2024 matapos ang halos isang dekadang pahinga mula sa pulitika.
“Hindi man tayo pinalad… Lumaban tayo ng patas,” bungad niya sa caption.
Baka Bet Mo: Banta ni Marjorie sa mga naninira kay Julia: Buhay na buhay pa ang nanay niya!
Mensahe pa niya, “Maraming Salamat sa 112k votes. Grabe kayong magmahal district 1! Pinaramdam ninyo sa akin yan saan man ako nagpunta.”
Dagdag niya, marami pa rin siyang pangarap para sa komunidad kahit wala siyang posisyon sa pamahalaan.
Nagpasalamat din siya sa mga tumulong sa kanya sa buong panahon ng election campaign.
Sey niya, “Hindi po tayo nagtatapos dito, pahinga lamang po ako ng kaunti at sa tulong ng Diyos matutupad pa rin ang mga pangarap ko para sa inyo nang hindi kailangan ng posisyon.”
“Grateful for the memories and the people I met along the way,” ani pa ni Marjorie.
Samantala, natalo rin sa pagka-konsehal sa ikalawang distrito ng Caloocan ang dating asawa ni Marjorie na si Dennis Padilla.
Kung matatandaan, bago ang araw ng halalan ay nasangkot sa kontrobersiya ang dalawa dahil sa naging iringan na lumutang matapos ang kasal ng kanilang anak na si Claudia.
Inireklamo ni Dennis na hindi raw siya nabigyan ng tamang pagtrato bilang “father of the bride.”
Matapang namang sinagot ni Marjorie ang akusasyon sa isang tell-all interview kasama si Ogie Diaz, kung saan isinalaysay niya ang umano’y pananakit at “toxic” na pag-uugali ng dating asawa sa kanya at sa kanilang mga anak na sina Claudia, Julia, at Leon.