ISANG bagong video ang ibinandera ng Peanut Gallery Media Network (PGMN) na nagdokumento ng pampulitikang paglalakbay ni Francisco “Isko” Moreno Domagoso.
Ito ay mula sa kanyang pagsikat bilang alkalde ng Maynila noong 2019 hanggang sa kanyang kasalukuyang layuning muling maging mayor ng lungsod sa 2025 lokal na halalan.
Ang video ng PGMN ay inilabas bago ang lokal na halalan sa May 12 at inaasahan na magiging isa sa mga pinakamahalagang laban ang mayoral race sa Maynila kung kaya’t ipinakita sa video ang termino ni Moreno bilang alkalde, ang kanyang kampanya noong 2022 para sa pagkapangulo, at ang kanyang patuloy na pagsusumikap na makabalik sa pagka-alkalde.
Unang nahalal si Moreno bilang mayor ng Maynila noong 2019 nang talunin ang noo’y incumbent na si Joseph “Erap” Estrada.
Baka Bet Mo: WATCH, NOW NA: Alamin ang dapat tandaan, mga bagong ganap sa Halalan 2025
Sa kanyang termino, nagkaroon ng malalaking proyekto sa urban renewal, kabilang ang paglilinis sa Divisoria, mga proyekto sa restorasyon ng mga makasaysayang pook tulad ng Luneta at Intramuros, at pagpapalawak ng mga serbisyong pangkalusugan lalo na noong panahon ng pandemya ng COVID-19.
Nagsimula rin siya ng mga programang pabahay tulad ng Tondominium at Binondominium upang magbigay ng abot-kayang tirahan para sa mga pamilyang may mababang kita.
Noong 2022, tumakbo si Moreno bilang presidente sa ilalim ng Aksyon Demokratiko at nagtapos sa ikaapat na pwesto sa pambansang halalan.
Matapos ang kanyang pagtakbo sa pagkapangulo, ang noo’y Bise Alkalde Honey Lacuna ang naging alkalde ng Maynila, at siya ang naging kauna-unahang babaeng alkalde ng lungsod.
Mula nang umupo sa posisyon, naharap ang kanyang administrasyon sa mga kritisismo, partikular na hinggil sa mga isyu ng krimen at kalinisan sa mga lugar tulad ng Divisoria.
Ngayon, naghahangad ng pagbabalik si Moreno sa kanyang dating posisyon, at itinuturing siya bilang kandidato na magbabalik ng kaayusan at pag-unlad sa lungsod.
Ayon sa mga survey na isinagawa ng OCTA Research at DZRH noong April 30, nangunguna si Moreno sa labanan para sa pagka-mayor, na may halos doble ang suporta kumpara sa kanyang mga kalaban na sina Lacuna at Sam Versoza.
Ang video ng PGMN ay inilabas bago ang lokal na halalan sa May 12, at inaasahan na magiging isa sa mga pinakamahalagang laban ang mayoral race sa Maynila sa mga halalan sa Metro Manila.